A Deputación organizará conferencias, actos de homenaxe e xornadas sobre a escritora ourensá
A Deputación de Ourense honrará a memoria da escritora e mestra Pura Vázquez no centenario do seu nacemento, como recoñecemento a "quen deu todo da súa intelectualidade en favor da súa terra", segundo expresou o presidente do entre provincial, Manuel Baltar.
O goberno provincial está a planificar diferentes actividades que se levarán a cabo para destacar o legado persoal e intelectual de Pura Vázquez. Entre elas, haberá conferencias, actos de homenaxe e xornadas que analizarán en detalle os aspectos académicos, pedagóxicos e culturais da escritora ourensá.
Pura Vázquez naceu en 1918 no barrio do Polvorín de Ourense, e entregouse á cidade na "docencia, creatividade e saberes culturais, que van máis aló das letras", destacou Baltar. De feito, cualificou á escritora como "o sentimento feito palabra pola súa Ourense e a autora por excelencia da literatura para nenos e mozos na nosa lingua". A súa obra abrangue un total de 45 títulos de poesía, narrativa e teatro, destinada principalmente ao público infantil e xuvenil, ao cal dedicou a súa altura intelectual e docente.
Carmen Purificación Vázquez Iglesias, Pura Vázquez, naceu o 31 de marzo de 1918 e faleceu o 25 de xullo de 2006. Ela e a súa irmá, Dora, mestras ambas, foron pioneiras da literatura infantil e xuvenil.
