Unha rodaxe cinematográfica non é doada, independentemente de que o soporte en cinta ou vídeo dixital sexa de longa ou curta duración. Por elo, o traballo desenvolto pola productora carballiñesa ‘Os Filmes da Píntega’ no tempo récord de tres días, a fin de levar á bo porto un guión de Pachi Baranda tivo un ritmo vertixinoso. E o resultado é a curtametraxe ‘Etcétera’, ‘que conta un momento no que se atopan dúas persoas descolgadas da sociedade, que simplemente non encaixan co patrón establecido’, comenta Baranda, tamén director desta pequena obra.
Unha ‘traxicomedia’ na que unha moza de vinte e poucos anos, vestida de noiva, chega a unha azotea co presunto obxectivo de tirarse ó valeiro. Pero no mesmo momento en que semella saltar, aparece por detrás dela outro xoven que impide que se tire e que ten o costume de rematar tódalas súas frases coa palabra ‘etcétera’. Eles son ‘Candela’ e ‘Sendeiro’, unhas personaxes ás que, respectivamente, dan vida Iria Sobrado e Xosé Pérez.
Equipo
‘Aproveitamos unha fin de semana para situa-lo escenario na planchada dun ático en construcción no Carballiño, para non interrumpir o traballo dos obreiros e tamén liberar á empresa que fai o edificio de responsabilidades’, sinala Pachi Baranda, xefe da productora e coordenador da montaxe posterior. ‘A curtametraxe está gravada nun soporte de vídeo de alta definición e con son Dolby SR, para unha duración de 13 minutos’. Pero detrás hai un equipo técnico integrado por outras cinco persoas para encargarse da fotografía, son, maquillaxe, montaxe e escenografía.
Todos eles tentan poñer a punto a cinta para poder levar a cabo a súa estrea no vindeiro mes de setembro. ‘Logo enviarémola curtametraxe a diferen tes festivais de Galicia e outras comunidades do Estado, para asegurar a súa distribución e, de paso, comproba-lo grao de aceptación de público e crítica’. Baranda engade que ‘se temos a sorte de recibir algún premio, moito mellor’.
