ÁREA METROPOLITANA

A Peroxa pide solución ao excesivo minifundismo

Medio Rural comprometeuse co alcalde a impulsar a mobilidade de terras

O alcalde de A Peroxa, Manuel Seoane, pediu onte á conselleira do Medio Rural, Ángeles Vázquez, unha "colaboración institucional" para afrontar o problema do minifundismo agrario, "que dificulta a instalación de empresas" no municipio. "Hai que poñer a producir terras abandonadas, porque non nos podemos permitir o luxo de telas así. Ou se traballan ou se ceden", explicou Seoane. 

A conselleira mostrouse "sensibilizada co problema", en palabras de Seoane, e confirmoulle que se traballará na solución. En concreto, ambos acordaron impulsar a mobilización de terras como xeito de dinamizar o medio rural, fomentando o seu aproveitamento con fins agrogandeiros.

Durante a xuntanza tamén se abordou o problema das árbores que invaden as estradas do municipio, xa que Seoane confesou que son "un perigo" para os vehículos. A conselleira transmitiulle a lexislación á que se pode acoller o Concello neste sentido. 

Outra das preocupacións que transmitiu o rexedor da Peroxa foi relativa á proliferación de niños de vespa velutina no municipio. Seoane propuxo axilizar a súa erradicación, e recibiu o compromiso de que Medio Rural os retirará nun prazo de entre cinco e dez días. 

TRACTOR NOVO

A titular de Medio Rural comprometeuse a estudar a solicitude do alcalde de contar cun tractor para roza de matogueira e así contribuír a reducir a biomasa nos camiños municipais e diminuír o risco de incendios forestais. 

Te puede interesar