Antonio Rodríguez "Toni", centrocampista reconvertido a lateral esquerdo por Luis Enrique esta tempada, está moi preto de pechar a súa saída do Celta de Vigo, despois de que nos últimos meses perdese a titularidade e pasase a ser un habitual descarte do técnico asturiano.
Aínda que desde o club non se quere confirmar a noticia, o seu axente, Pedro Bravo, xa sinalou que está negociando con outros clubs para encontrarlle un novo destino ao seu representado.
E esta mañá, o seu compañeiro Jonathan Castro "Jonny", precisamente o xogador que o supliu no equipo titular no lateral esquerdo, confirmou, sen querer, que Toni xa lles comunicou a noticia na súa comparecencia ante os medios de comunicación.
"Non sei o que saíu pero el o luns xa nos... Ben... Isto pódoo contestar?", preguntoulle o xogador da canteira ao xefe de prensa do Celta, quen lle respondeu que "ten días libres".
Aínda que nas últimas horas vinculárono co Deportivo da Coruña, club da súa cidade, o máis probable é que Toni marche a xogar fóra de España. Conta con varias ofertas dos EUA, Tailandia e Rusia. O futbolista, con permiso do club, ausentouse dos últimos tres adestramentos.
