O ministro de Fomento, José Blanco, considerou hoxe que se Galicia é o 'campo de probas' do PP para gobernar España xa hai un 'resultado', e é que foi un 'experimento frustrado' despois de pasar dun plus 'de resistencia' hai algo máis de dous anos a un 'plus de debilidade'.
Blanco participou hoxe na inauguración do curso 2011-2012 do Fórum Europa-Tribuna Galicia en Compostela, onde repasou a actualidade política internacional, nacional e autonómica ante o delegado do Goberno, Miguel Cortizo; o líder do PSdeG, Pachi Vázquez; o conselleiro de Infraestruturas, Agustín Hernández; e deputados, senadores e alcaldes, entre outras autoridades.
Durante a intervención, o tamén ministro voceiro do Goberno e vicesecretario xeral do PSOE recomendou ao Goberno galego 'abandonar a austeridade de ideas' que só leva a perder benestar e competitividade, para pasar a unha 'contención racional do gasto e un aumento selectivo de ingresos' para reactivar a economía sen menoscabar os servizos públicos.
Opinou que o que fixo o PP en Galicia 'non funciona' e por iso aconsellou 'revisar vellos tópicos' porque 'os recortes en educación e sanidade non se fan a cambio de crecemento económico'.
'Se tal e como se afirma Galicia, díxoo aquí (Mariano) Rajoy, foi un campo de probas para un hipotético futuro goberno do PP en España, xa temos resultado: experimento frustrado', sentenciou Blanco, quen advertiu de que 'o discurso da austeridade é unha arma de dous gumes' e non se pode asumir con 'resignación' un 'slogan baleiro'.
Ao seu xuízo, a estabilidade orzamentaria non debe ser un pretexto para debilitar servizos públicos esenciais como educación e sanidade' e Galicia é, insistiu, un 'campo de probas' sobre as consecuencias do 'recorte de servizos públicos'.
