O ministro de Xustiza, Francisco Caamaño, asegurou hoxe na Coruña que os últimos meses da lexislatura serán 'decisivos' para 'consolidar reformas imprescindíbeis'.
Caamaño dixo que os próximos meses até o final da lexislatura 'non serán baleiros', e sinalou que 'se esperan días de moito ruído' que requirirán de 'tempero e sentido da responsabilidade'.
'Non nadamos neste longo océano de case dous anos coa maior crise económica dos últimos tempos para renunciar agora que estamos a punto de chegar a porto', declarou Caamaño durante a súa intervención nun acto informativo organizado por 'Fórum Europa. Tribuna Galicia'.
O ministro subliñou que España está en termos de recuperación económica e social nos momentos 'máis candentes' e advertiu de que 'tan grave como non reformar sería o aparcamento das reformas'.
'Chegou o tempo de afrontar os retos apartando os falsos envoltorios e as ideas etéreas e é hora de empezar a chamar as cousas polo nome, e se o facemos todos, cidadáns e responsábeis públicos, comezaremos a ver moito máis nítido o lugar onde de feito estamos', declarou.
Caamaño lembrou que no pasado venres o Goberno aprobou o obxectivo de estabilidade conforme o cal o límite de gasto para 2012 será 3,8 por cento inferior ao deste ano.
'España cumpre así o seu obxectivo de gasto de acordo co pactado coa Comisión Europea e é importante subliñar que a pesar desa redución o gasto das comunidades autónomas se incrementa en 7.900 millóns e tamén crece o dos concellos, o que significa que a Administración xeral do Estado vai soportar máis severamente que outras as políticas de austeridade e consolidación fiscal', apostilou.
Explicou que este 'desequilibrio no esforzo' se fixo 'pensando sobre todo nos cidadáns e contando cun exercicio responsábel por parte das comunidades autónomas e dos concellos'.
'Desde o Goberno esperamos que as comunidades autónomas dediquen eses case 8.000 millóns de euros a facer fronte aos gastos sanitarios e educativos, mentres que os concellos reserven os seus recursos extra a pagar a provedores e a políticas de emprego', indicou o ministro.
Caamaño insistiu en que o Goberno 'cumpre co seu obxectivo de déficit' e ao tempo 'aposta por manter certas políticas sociais', ademais de advertir de que 'agora corresponde ás comunidades autónomas levar a cabo esas políticas de contención do gasto sen reducir as prestacións sanitarias ou educativas'.
'Se o fixesen aducindo as necesidades dunha política máis austera non estarían dicindo aos cidadáns toda a verdade e si estarían ocultando unha mala xestión dos recursos públicos', advertiu o ministro de Xustiza.
Con respecto ao seu departamento, precisou que 'as cousas son un pouco máis complexas' porque na repartición de competencias hai que sumar comunidades autónomas e organismos xudiciais.
Valorou o desenvolvemento do Plan estratéxico de modernización da xustiza presentado hai dous anos e medio, que, afirmou, 'achegou unha cultura radicalmente nova baseada nunha concepción preferente da xustiza non como poder senón como servizo público para os cidadáns'.
