O presidente da Xunta, Alberto Núñez Feijóo, defendeu hoxe a xestión do seu goberno en emprego social, coa creación de 9.500 postos de traballo en 2010, despois dos reproches do líder do PSdeG, Manuel Vázquez, por 'converter o contrato con Galicia nunha estafa a Galicia'.
Núñez Feijóo respondeu esta mañá no pleno do Parlamento unha pregunta de Vázquez acerca do seu compromiso coa creación de infraestruturas sociais pois, a xuízo do PSdeG, a Xunta caracterízase pola 'destrución neta de emprego e das políticas sociais' e pola anulación de programas neste ámbito.
'Tanto en política social como na financeira (dixo en alusión á pregunta anterior sobre a caixa galega) está a se converter nun auténtico especialista en ir de vitoria en vitoria até a gran derrota final', espetou Vázquez a Feijóo, a quen pediu que 'teña o xesto' e diga 'hoxe aquí a verdade a Galicia'.
O dato é que en 2010 o Goberno galego creou 9.500 empregos no ámbito social, respondeu Feijóo ao final da súa intervención.
Con anterioridade, reprochou ao líder socialista que o seu goberno 'deixou a deber 2.600 millóns de euros', que 'todos os centros sociais que fixo os deixou a deber' e que con ese diñeiro podería abrir non un senón '15 centros en cada concello de máis de 1.500 habitantes'.
'Promesas, cantidade', volveu recriminar ao PSdeG, que antes de finalizar a lexislatura anterior prometeu 135 infraestruturas en 80 concellos por 140 millóns de investimento, lembrou, mentres que en 23 meses de goberno a actual Xunta creou tantos empregos sociais como os socialistas en catro anos, ademais de 4.500 prazas en servizos sociais e o triplo de dependentes atendidos, dixo.
Ademais, en 2011 abriranse e financiaranse 1.000 prazas en escolas infantís e 500 en centros de día 'a pesar de ter que pagar toda a política social que vostedes deixaron a deber', reiterou Núñez Feijóo, quen enumerou os 11 centros de día en funcionamento co seu goberno, 29 gardarías infantís e 1.963 prazas.
'Que valor', dicían os parlamentarios da oposición, cuxas protestas ante estes números que se atribuíu Feijóo obrigaron a presidenta do Parlamento, Pilar Rojo, a pedir silencio.
O líder do PSdeG recriminou ao presidente da Xunta ser 'dobremente cruel' porque a súa xestión afecta aos máis necesitados e reprochoulle tamén que continúe a vivir unha 'realidade virtual' en Galicia ao acudir á Cámara autonómica cun 'popurrí de cifras para ocultar a verdade', que é que 'non abriu un só centro de día' nin creou emprego.
'Estase convertendo no destrutor das políticas sociais en Galicia', considerou Vázquez sobre Feijóo.
