A Garda Civil imputou a M.D.A., de 49 anos de idade e veciño de Portas, como presunto autor de dous delitos contra a seguridade vial, por conducir un vehículo baixo os efectos de drogas e co carné sen vixencia por perda de puntos.
O pasado luns, día 5, no quilómetro 8,5 da estrada PO-531 (Pontevedra-Baión) no termo municipal de Barro (Pontevedra) produciuse un accidente de circulación por colisión de dous turismos, tras o que acudiron ao lugar efectivos do Destacamento do subsector de Tráfico da Garda Civil de Pontevedra.
Ante as sospeitas de que o condutor, responsable do accidente, puidese atoparse baixo os efectos de substancias estupefacientes, solicitouse a presenza do Equipo de Atestados, que procedeu a realizarlle a proba de detección de drogas, na que deu resultado positivo.
Ademais, esta persoa tiña o permiso de conducir sen vixencia por perda total dos puntos asignados. Por todo iso, se procedeu á súa imputación e instrución das correspondentes dilixencias que foron entregadas no Xulgado de Instrución número 2 de Caldas de Reis, onde terá que presentarse o imputado cando para iso sexa requirido.
