A Garda Civil de Brión foi a que interveu, tras a denuncia dunha muller, e a detención deste home que imparte clases na Facultade de Económicas produciuse no municipio de Teo
O profesor adscrito á Universidade de Santiago (USC) Luciano Méndez Naya, expedientado o pasado 11 de maio por defender á denominada "Manada" de Pamplona, un abuso sexual en grupo nos Sanfermíns de 2016, atópase detido por presunta violencia machista.
Fontes do caso indicaron a Efe que en breve se enfrontará a un xuízo rápido e que a causa do arresto parece estar nunha discusión cunha muller coa que tiña unha relación sentimental, tras a cal a agrediría, extremo que agora deberá dirimirse nos tribunais. Ao parecer, ela quería a ruptura.
A Garda Civil de Brión (A Coruña) foi a que interveu, tras a denuncia dela, e a detención deste home que imparte clases na Facultade de Económicas produciuse no municipio de Teo (A Coruña).
A Universidade de Santiago (USC) abriu o 11 de maio de 2018 un expediente informativo a Méndez Naya, que empregou as súas redes sociais para dar a coñecer nun vídeo a súa opinión de que a vítima da Manada "gozou".
"Chegan alí, déixase facer, evidentemente, e goza. Non vin o vídeo, pero non o necesito", chegara a recoñecer por esta vía.
A pesares desta medida disciplinaria, no seu muro aberto de Facebook chegou a lanzar con posterioridade outro documento audiovisual para comentar que a "razón" estaba do seu lado, como de todo aquel que comparte a súa postura como unha reflexión seria e coherente sobre uns feitos en cuestión.
"A probabilidade de que as cousas sexan como eu as contei son dun noventa e moitos por cento", dixera.
Méndez Naya saltou por primeira vez á prensa por realizar uns comentarios machistas en 2016 sobre o escote dunha das súas alumnas, que acabou deixando os seus estudos.
Aparte de ser sancionado nese momento coa suspensión de emprego e soldo por un período de dous meses, numerosos estudantes mobilizáronse na súa contra.
O ano pasado tamén protagonizou un incidente na capital galega con dous policías que lle advertiron de que non podía aparcar nas inmediacións da comisaría. Entón, enfrontouse a lesións e a un delito de atentado á autoridade.
