Carlos Rodríguez: “Pretendemos achegar a nosa biblioteca á xente”

Carlos Rodríguez acaba de ser elexido presidente do Centro de Estudios Chamoso Lamas do Carballiño. Entre os seus proxectos está a creación dunha biblioteca cos 7.000 volumes e 5.000 documentos para acercar o traballo da entidade á poboación, especialmente aos mozos. Que supón para vostede ser o novo presidente do Centro de Estudios Chamoso Lamas? O Centro está nunha etapa de formación de nova directiva, porque a anterior levaba bastantes anos ao frente, encabezada por Xosé Luis Sobrado, que xa estaba un pouco canso. É unha maneira de botar unha man para que a entidade siga para adiante, tras casi 30 anos de andaina, porque no próximo mes de maio cumprimos 28 anos de existencia. O cambio débese só ao cansazo? A directiva levaba bastantes anos e era necesario un descanso e renovar a xunta, que se creará nas próximas semanas. Somos un centro que aínda que teñamos presidente e directiva, todo o mundo participa nas actividades e en todo o que se fai, é un traballo colectivo. Somos 30 socios e todos participamos. Vostede é socio fundador. Cal é o motivo da creación da entidade? No Carballiño non había moitas publicacións e naceu sobre todo para estudar e preservar o patrimonio histórico das comarcas de Carballiño e O Ribeiro, para por en valor ese patrimonio, divulgalo e publicalo sobre estas dúas comarcas limítrofes, que son a base do Centro de Estudios. Cales son agora os obxectivos con vostede como presidente? O ano pasado aplazamos o congreso, que celebramos cada dous, por causa da pandemia, polo que este ano desenvolverase a doceava edición a finais do próximo mes de setembro. Vamos traballar nesa cuestión e nunha nova proposta importante, partindo da base de que o Centro de Estudios ten un fondo bibliográfico e documental extraordinario, con 7.000 volumes sobre distintas disciplinas ao redor do patrimonio histórico. Un fondo moi importante ao que pretendemos que accedan os estudantes, profesores e investigadores. Como temos a sede en Cabanelas é necesario desprazarse en coche, por iso traballamos coa proposta de trasladar eses 7.000 volumes e 5.000 documentos dixitalizados para darlle accesibilidade. Será unha biblioteca específica do Centro de Estudios Chamoso Lamas? Si, trátase de dispor dun lugar onde crear esa biblioteca. No caso de que cheguemos a un acordo, buscaremos o apoio de institucións e de persoas que queiran colaborar para dispor dun local onde ubicar eses volumes. Imos empezar cunha nova catalogación dixitalizada co obxectivo de achegar estes fondos á xente dunha maneira cómoda. É un proxecto que está sobre a mesa do Centro de Estudios e intentaremos levalo a cabo. É importante o achegamento á poboación? É importante porque tamén intentaremos incorporar máis socios, sobre todo xente nova para chegar ata as 50 ou 60 persoas, incidiremos nos estudantes, dar cabida á xente con novas ideas. Tamén vamos intentar ampliar e mellorar a nosa web, chegando incluso ás redes sociais. Estanse cumprindo as aspiracións de fai 28 anos? Por suposto. Imos publicar as actas do anterior congreso e traballar intensamente na organización do próximo. Son máis de 12 anos de publicacións de centos de traballos que de non ser por o Centro de Estudios non se coñecerían. Tamén seguiremos coas andainas para explicar o noso patrimonio e imos elaborar un programa de actividades anual. Polo que conta haberá algúns cambios? Pode haber ideas novas pero o importante é manter a nosa esencia e ampliar as perspectivas para achegarnos á xente. Queremos atraer a máis xente e que non se perda este legado. O seu último traballo foi como técnico de Cultura e responsable de comunicación no Concello do Carballiño. A que se dedica agora? Leo e escribo moito. Estou en ciernes de publicar a novela “Alfonso Graña, Rei dos Jíbaros”. Unha historia extraordinaria dun emigrante de finais do século XIX ao Brasil. Dende a Galicia profunda ata a Amazonia. A obra foi finalista no Premio Fernando Lara, no ano 2017, e desde aquela funo millorando e en dous ou tres meses publicarase.