O BNG, “garantía” de que non haberá un goberno PP-DO

O BNG é “a única garantía” de que a cidade non estea gobernada tralo 28 de maio “nin polo PP nin por DO”. Así o manifestou onte a voceira nacional do BNG, Ana Pontón, acompañada do candidato á alcaldía, Luis Seara, nunha charla no Campus co alumnado, na Facultade de Educación, onde amosou a fronte nacionalista como a única que impedirá que goberne a dereita “en ningunha das súas versións”. Sobre un pacto dos populares e a forza de Gonzalo Jácome, Pontón sinalou que “os feitos falan por si sós” e lembrou que “se o fixeron hai catro anos, volverano facer se o precisan”. Neste senso, acusou ó PP de estar interesado “só en manter o poder polo poder”, e amosoulle á cidadanía ourensá que ten “a oportunidade” co BNG de “abrir unha etapa nova e diferente” cun goberno nacionalista: “Somos a única formación que garante que non vai gobernar nin Jácome nin o PP, de que a dereita, nunha versión ou noutra, non vai gobernar”. Pontón asegurou que o BNG preséntase con Seara como candidato cun “proxecto ilusionante, cun equipo e con ideas”. Nesa liña, dixo que serán “o acelerante” para que a cidade recupere “o orgullo de ser de Ourense”, e referiuse á mocidade como “parte importante” do proxecto e “motor de cambio” para “devolver o rumbo” á urbe. Pola súa banda, Seara pediulle á mocidade un “cambio” para que a cidade poida “pasar do século XX ao século XXI”, tras criticar que o actual alcalde non puxera en marcha “ningunha política” para os novos, desmantelase o Espazo Lusquiño e limitase o mandato a “unha cuestión festiva” con “cero” propostas culturais. Cualificou como “encefalograma plano” o mandato e ofreceu aos xóvenes o soterramento da avenida Otero Pedrayo para dinamizar o Campus e recuperar eventos como a Miteu, FITO, MOTI, Corpo a Terra… Tamén prometeu políticas para acceder a “vivendas dignas” e converter o Centro de Iniciativas Empresariais nun Centro de Emancipación Xuvenil. Primeira matrícula gratis Pontón, que animou ós mozos a “participar na política en todas as súas formas”, anunciou unha dobre iniciativa que o BNG levará ao Parlamento para que ningún mozo teña que deixar os seus estudos debido á crise. Por iso, propoñen a creación de bolsas anticrise (con dotacións extra de entre 200 e 500 euros) e a gratuidade da primeira matrícula na universidade no curso 2023-2024 para todos os xóvenes.