Rubén Riós presenta hoxe os seus derradeiros traballos cinematográficos, e mañá será o turno de "O Carrabouxo"
O departamento de Lingua e Literatura Galega do IES Otero Pedrayo organizou un programa de conferencias no centro co gallo da celebración do Día das Letras Galegas. Ao longo destes derradeiros días, varios escritores e artistas galegos están a presentar as súas obras aos alumnos do instituto durante as clases da materia.
O actor, produtor e director ourensán Rubén Riós será o encargado de presentar hoxe, a partir das 12,30 horas, os seus derradeiros traballos cinematográficos aos estudantes de primeiro de Bacharelato, mentres que mañá será o turno do debuxante Xosé Lois "O Carrabouxo", ás 12,20 horas, cos alumnos deste mesmo curso.
Durante os derradeiros días, visitaron o Otero Pedrayo os escritores Francisco Castro, coa súa novela "O corazón da branca de neve"; Andrea Maceiras, que presentou o seu libro "Violeta tamurana"; Lola Gándara, con "Smerling: na tea da araña", e Ledicia Costas, que amosou aos alumnos a súa novela "Recinto gris". Ademais, dentro da programación do Día das Letras Galegas, estudantes de varios cursos do centro participaron no Correlingua e na Mostra de Teatro Escolar (Moteces).
