A vaca Sonia chegou a Italia despois de conseguir o título de Vaca Gran Campioa na Moexmu de 2013, no concurso de gando frisón que se celebra cada ano en Muimenta, no municipio lugués de Cospeito
Unha frisoa criada nunha explotación agropecuaria de Lugo conseguiu o premio á mellor vaca no concurso nacional máis importante que se celebra en Italia de produtoras de leite, concretamente na cidade de Cremona, segundo informaron a EFE fontes de Africor.
A vaca Pozosaa Goldwyn 9545 Sonia, nacida e criada na Casa Pozo, unha explotación de Lugo, conseguiu o título de 'Vaca Gran Campioa Reserva" no certame de Cremona, un concurso nacional en que só poden participar gandarías do país transalpino, aínda que as granxas poden presentar animais importados doutros países.
A vaca Sonia chegou a Italia despois de conseguir o título de Vaca Gran Campioa na Moexmu de 2013, no concurso de gando frisón que se celebra cada ano na localidade de Muimenta, no municipio lugués de Cospeito.
O xuíz dese certame, o italiano Giuseppe Beltramino, "quedou tan marabillado con ese animal", explican desde Africor, que acabou por compralo e levalo para a súa granxa en Italia.
Só un ano despois da súa chegada a esa granxa italiana, Sonia conseguiu ese importante galardón, polo que Africor destaca que "tanto o seu propietario como o criador, Casa Pozo, teñen que estar moi orgullosos do traballo realizado".
