Xinzo ultima a apertura do albergue de peregrinos

O concelleiro de Obras, Urbanismo e Infraestruturas de Xinzo de Limia, Manuel López Casas, informa da inmediata posta en marcha do albergue de peregrinos da vila. O Concello cederalle o edificio a Turismo de Galicia quen, a través de S.A. de Xestión do Plan Xacobeo, fará unha subcontratación a unha empresa de servizos. Actualmente o organismo da Xunta conta coa administración de 42 albergues da rede pública e dos catro centros de interpretación do Camiño de Santiago.

O concelleiro, Manuel López Casas, asegura que se ven de "firmar un convenio coa Xunta de Galicia para que esta faga a explotación" e que o pasado mércores, 14 de decembro, achegáronse a revisar o complexo representantes do Xacobeo. Porén a xestión non se fará efectiva ata que se rematen os asuntos relacionados cos equipamentos e subministracións. Manuel López Casas, afirma que quedan por tramitar "o boletín de enganche da luz, o contrato de auga e máis o do gas".

O albergue de peregrinos construiuse a partir da adaptación de tres casas da Rúa Serra San Mamede número 2. Esta rehabilitación levouse a cabo polo Concello de Xinzo de Limia, quen contou cunha subvención para tal fin. Aínda que as obras remataron hai xa un ano, a cesión do edificio vense demorando, á espera de que se faga cargo del o Xacobeo, e os peregrinos que se acercan á zona son desviados ás instalacións que se encontran situadas en Sandiás e Vila de Rei, esta última no concello de Trasmiras.