"Cadernos da Limia" poderase ver ata o vindeiro 13 de xaneiro

A exposición “Cadernos da Limia” do fotógrafo Blas González pechará o sábado 13 de xaneiro ás 19:00 horas. O fotógrafo Blas González explicou que a exposición “foi unha sucesión de experiencias incribles e emocionantes: concibir, deseñar, producir, exhibir e activar este traballo, pero agora chega o momento da despedida”.

A maiores, quixo agradecer por todo o apoio recibido, o interese do público e a participación en cada unha das actividades con algo moi especial: a proxección de “O Maquinista da Xeral” de Buster Keaton (1926), película considerada como unha das mellores da historia do cinema mudo, e que será proxectada con música orixinal en directo interpretada por Caspervek.

Caspervek Trio debutou en 2013 e desde entón converteuse nun referente en musicalización de cinema mudo, con actuacións en máis de 14 países europeos e representacións nalgúns dos principais escenarios nacionais e internacionais.

Esta será a primeira vez que o conxunto actúe na Limia para clausurar a exposición na Casa da Cultura de Sandiás.