O Concello de Xinzo dedicará un monolito a Toñito Castro

O ex-xogador, técnico e directivo do Antela, Toñito Castro "Maestro", falecido en xuño do pasado 2015, terá un monolito en Xinzo de Limia lembrando a súa figura. Toñito Maestro, que xa deu nome ao Torneo Memorial organizado polo Antela, era unha figura moi querida na vila limiá na que pasou practicamente toda a súa vida.

Este monumento que lle dedicará o municipio de Xinzo, de seis toneladas de peso e 2,30 metros de alto, está deseñada e esculpida polo artista limián Xosé Lois Carreira.

O seu asentamento definitivo aínda non está decidido, mais o veredito final corresponderá ao grupo de goberno local.

En apenas unhas semanas, toda a veciñanza do concello poderá lembrar a un persoeiro querido por todos na comarca. "O que quixen con esta obra é facer unha homenaxe ós canteiros por un lado e ós petroglifos por outro", afirmou o autor da obra, Xosé Lois Carreira.