O Inorde forma expertos da agricultura en Xinzo

O Centro Agrogandeiro de Xinzo acolle dende o pasado 9 de xaneiro e ata o vindeiro día 3 de maio, un curso de Actividades auxiliares en agricultura que permitirá formar novos profesionais neste eido e outorgarlles a certificación correspondente -certificado de profesionalidade de Nivel 1-.

O obxectivo desta acción formativa, financiada pola Xunta de Galicia e o Ministerio de Educación e Formación Profesional, é aprender a executar operacións auxiliares en cultivos agrícolas seguindo instrucións de superiores ou plans de traballo, e cumprindo as medidas de prevención de riscos laborais, calidade e protección do medio ambiente. O curso terá unha duración total de 388 horas impartidas en horario de mañá de 09,00 a 14,00 horas. O módulo de prácticas profesionais non laborables do curso constará de 40 horas. Ao final do mesmo, impartiranse 18 horas de formación transversal en inserción laboral, sensibilización ambiental e formación en igualdade.

Algúns exemplos de postos de traballo para os que habilitará ao alumnado este curso son: Peón agrícola, agropecuario, en horticultura, en fruticultura, en cultivos herbáceos, en cultivos de flor cortada, peón de xardinaría, de viveiro, de centros de xardinaría ou peón de campos deportivos.

A xerente do Inorde, Emma González, explicou na visita a Xinzo que os obxectivos desta primeira acción formativa son, por unha banda, “formar ao maior número posible de persoas para dotar de man de obra especializada a un dos sectores clave na economía provincial e, por outra banda, dado que o curso está pensado principalmente para desempregados, ofrecerlles a oportunidade de formarse nunha materia que demanda traballadores”.