O Inorde formou a 14 alumnos no eido agrícola

Un total de 14 persoas participaron na formación impartida no Centro Agrogandeiro de Xinzo -dependente do Inorde- para adquirir coñecementos agrícolas, concretamente, formación de actividades básicas neste sector.

Durante os últimos meses, o alumnado, que recibiu cadanseu diploma acreditativo, recibiu formación en relación aos labores de plantación dos diversos cultivos, ao tipo de sementes e plantas máis cultivadas na zona, ás prácticas de fertilización e abonado sostibles e respectuosas co medio natural, á rega e á instalación de material neste senso, ao coidado de cultivos en relación ás pragas e enfermidades, á recolección e aos traballos a ela asociados, e aos traballos de almacén.

A formación tivo un apartado solidario. Nesta liña, producións de todos os cultivos sobre os que pivotaron as actividades formativas serán destinadas a labores de apoio social para servir de produto fresco a comedores sociais, a parroquias asociadas a Cáritas Ourense, así como a outras institucións como o Banco de Alimentos de Ourense. A xerente do Inorde, Emma González, e a coordinadora de Programas de Cáritas Ourense, Carmen Alonso, entregaron os diplomas.