Unións Agrarias pide axuda logo dos danos do temporal

A organización Unións Agrarias vén de solicitar axudas económicas para paliar os estragos que causaron as inundacións ocorridas nas últimas semanas na Comarca da Limia. Neste senso, apuntan aos produtores de cereais como os principais afectados e alertan de que a sementeira da pataca "pode verse comprometida" se non mellora a situación do solo.

Por todos estes motivos reclaman "a condonación ou bonificación dos custes de Seguridade Social, e a rebaixa na tributación de módulos coa Axencia Tributaria xa que as perdas teñen sido de tal magnitude no cereal de inverno, -se non mellora moito a situación tamén no de primavera-, que a rendibilidade das explotacións é practicamente nula".

Por outro lado, pídese tamén que se activen desde Medio Rural as axudas que están previstas para estas situacións e co obxectivo de que as explotacións poidan saír adiante. Din que seguen afectadas mais de 2.000 hectáreas, "o que ven a supoñer unhas perdas directas de 1.200.000 euros pola sementeira perdida".