Xinzo, Barrio e Sandiás empoderan ás mulleres

Os Concellos de Xinzo de Limia, Vilar de Barrio e Sandiás continúan co Programa Hypatia para a promoción da igualdade e a prevención da violencia de xénero. Dende comezos do pasado mes de xullo ata a actualidade, viñéronse celebrando distintos obradoiros vencellados ao logro da autoestima, á activación da mente e do corpo, á formación básica en políticas e recursos de igualdade, ou á prevención da violencia. Ademais, nos tres municipios tivo lugar a actividade “Cimena forum” para tratar, a través do audiovisual, as temáticas abordadas durante toda a programación.

Este xoves, no marco dun obradoiro sobre as oportunidades da idade -celebrado na Casa da Cultura- a secretaria xeral da Igualdade, Susana López Abella, achegouse ata a vila limiá, onde foi recibida pola rexedora de Xinzo, Elvira Lama; e os alcaldes de Sandiás e Vilar de Barrio: Felipe Traveso e Manuel Conde, respectivamente. A Xunta de Galicia financia este programa con 17.000 euros.