Procesión de fe en Trives coa súa Virxe da Dolorosa

A Pobra de Trives amosou este domingo un ano máis a súa gran devoción pola Virxe da Dolorosa, na xornada grande coa que puxo fin ás festas na honra ao Santo Cristo e a Dolorosa.

A procesión matinal, precedida por un pasarrúas a cargo da banda Lopo Lías de Boborás, foi de novo unha celebración de gran solemnidade que combinou emoción e fe, e na que participaron centos de veciños.

Trala imaxe da Dolorosa e do Cristo tamén fixeron o percorrido algunhas persoas descalzas, cumprindo deste xeito con diversas promesas e ofrendas que realizaran.

Á tarde regresou a música de Lopo Lías, antes de celebrarse unha festa e verbena coa orquestra Salsarena, que puxo o broche de ouro á gran celebración trivesa.