Os escritores e os axentes editoriais, protagonistas do Festival Literario

Volve o FLAZ a Allariz co obxectivo de consolidar un espazo de encontro entre a comunidade lectora e todas aquelas persoas que forman parte da cadea de valor do libro. Os días 5 e 6 de xullo, o Festival Literario de Allariz acolle os autores Antón Riveiro Coello, Carlos Meixide, Marta Orriols e Berta Dávila, e os axentes literarios Marina Penalva e Bernat Fiol.

O Festival Literario de Allariz, nacido en 2022, é un proxecto de acción para a promoción e o fomento da lectura, que reúne durante dúas xornadas figuras da narrativa peninsular, da man da libraría Aira das Letras e do Concello de Allariz.

“Memoria e historia na novela”, un diálogo entre Antón Riveiro Coello e Carlos Meixide, será o primeiro encontro deste terceiro FLAZ, na tarde do 5 de xullo, na Sala de Exposicións A Fábrica de Allariz.

"Todo o que quixo saber sobre os axentes literarios e nunca se atreveu a preguntar” é o título do diálogo entre Marina Penalva e Bernat Fiol, que terá lugar o sábado 6 de xullo ás 12,00 horas, na Fábrica de Allariz.

Xa na tarde do sábado, encontro entre dúas autoras: Marta Orriols e Berta Dávila baixo o título “A vida cotiá como materia prima na literatura actual”.

“Escribir e publicar non son a mesma cousa”. Así se titula a mesa redonda coa que a programación do FLAZ 2024 rematará o sábado ás 19,30 horas, coa participación de todas as figuras convidadas: Antón Riveiro Coello, Carlos Meixide, Marina Penalva, Bernat Fiol, Marta Orriols e Berta Dávila. Conversas, sinaturas e visitas ao patrimonio da zona formarán parte do festexo da lectura e do libro.

O FLAZ conta co apoio de Xeitura Patrimonio Sociedade Cooperativa, Fina Rei, os restaurantes Fio de Liño e Alarico, a libraría Maruxairas e Aira Editorial.