As fundacións Vicente Risco e José Saramago compartirán proxectos

O pasado venres 12 de xullo, tivo lugar un encontro institucional entre a Fundação José Saramago e a Fundación Vicente Risco, encabezado polas presidentas de ambas as dúas institucións, Pilar del Río e Celia Pereira.

A reunión foi na sede da Fundação Saramago, na Casa dos Bicos, en Lisboa, no marco do convenio asinado entre a Fundación Vicente Risco e a I Cátedra José Saramago da Universidade de Vigo, que dirixe Burghard Baltrusch, que, deste modo, comeza a dar os seus froitos e, na mesma, abordáronse proxectos en común para realizar no futuro que se irán anunciando oportunamente.

O obxectivo da Fundação José Saramago e a Fundación Vicente Risco é difundir a obra do Nobel portugués, José Saramago, e o traballo da fundación que leva o seu nome, así como todos os traballos que desenvolve a I Cátedra José Saramago da Universidade de Vigo en Galicia e tamén afondar no coñecemento da obra de Vicente Risco e a cultura galega en Portugal.

A maiores, a Fundación Vicente Risco, co ánimo de chegar a todos os públicos e colaborar coa consecución dunha sociedade máis inclusiva, vén de editar o libro “Galicia é un mundo”, onde se recollen 50 citas de Vicente Risco, ao sistema braille para facelo accesíbel a persoas que teñen discapacidade visual.

Dez linguas

Trátase dun texto que xa está dispoñíbel en dez linguas distintas de todo o mundo e agora ábrese a este colectivo.

Hoxe, martes día 16 de xullo, ás 11,30 horas, a Fundación Vicente Risco encargase da presentación pública e entrega de exemplares para a Biblioteca pública de Ourense Nós.