Nace un proxecto para recuperar a toponimia de Allariz

“A memoria das aldeas” é un novo proxecto que se está a desenvolver dende Allariz en colaboración coa Plataforma Galicia Nomeada e que pretende recopilar a toponimia de todos os pobos que integran o concello para evitar a súa desaparición. Trátase, concretamente, de recoller o nome de terras, regatos, penedos ou fontes deste entorno, xa que moitos so existen xa na memoria das persoas maiores.

Representantes das áreas de Cultura e Igualdade -baixo a coordinación de Cristina Outeiriño, técnica de Igualdade- están recorrendo os pobos da vila para, da man de asociacións veciñais, realizar este plan que pretende afondar e preservar a memoria alaricana. As primeiras agrupacións en participar neste proxecto colaborativo foron a de Nanín e a de Santa Marta de Roiriz. Durante os vindeiros catro meses, “A memoria das aldeas” chegará a Torneiros, San Mamede de Urrós, Roimelo, Queiroás, Valverde, Coira, Meire, O Mato, Seoane, Outeiro e Gundiás. Neste senso, dende o Consistorio solicitaron a colaboración veciñal -dende as persoas máis novas, ata ás máis maiores- para, insisten dende a administración local, “colaborar para preservar e salvagardar o patrimonio colectivo tan rico que hai no noso territorio”. Neste senso, esta iniciativa comezou a rodar neste mes de xaneiro e prolongarase ata o mes de maio, percorrendo un total de 12 asociacións veciñais de Allariz.

A Alcaldesa de Allariz, Cristina Cid, lembrou a importancia de recoller toda esta información histórica e etnográfica para que non se perda, e agradeceu a súa implicación a todas as persoas que xa colaboraron con esta nova e importante iniciativa