Paderne de Allariz relaxouse e gozou do mellor ioga

O Concello de Paderne de Allariz acolleu durante a tarde deste martes, a partir das 20,30 horas, unha das actividades deportivas de +Deporte La Región, na pista de baloncesto situada en fronte ao concello, cunha duración dunha hora.

A sesión, impartida polo instrutor Alejandro Alonso, garantiu exercicio e relaxación. “Eu levo oito anos practicando ioga, e o que eu fago chámase Hatha Ioga”, explica o monitor.

Esta actividade de ioga creouse hai 125 anos. “É unha variante que é moi xoven no ioga, comparado co que é o propio ioga, que ten ao redor de 5.000 anos, nacendo na India”, detalla Alejandro.

O que busca este estilo de ioga é levar a práctica ao “noso estilo de vida”, define o instrutor. “É un ioga que se adapta moito ao estilo de vida actual. Busca achegarse a todo o mundo, tendo unha capacidade moi grande de adaptación, axudando a relaxar o corpo e a mente”.

Para Alejandro, o ioga é “para todo o mundo, para todas as idades. O que pasa é que hai que adaptalo a esas persoas”. Hai certos estereotipos que están arraigados na poboación que para o monitor son “erróneos”.

Paderne de Allariz puido vivir a experiencia da actividade de Alejandro, comezando cunha activación de 10 minutos, relacionada co pilates. Despois desa activación, fíxose un Surya Namaskar, “saúdo ó sol”, un exercicio dinámico que busca concectar co ceo e coa terra. ”Un exercicio que facían e que fan os ioguis e as ioguinis cando se espertan no día, para agradecer a chegada do sol do novo día”. Para finalizar, realizouse a táboa de asanás, que consiste nunhas posturas mantidas, axudando a fortalecer os músculos.