O polígono agroforestal de Solbeira avanza en Paderne de Allariz

A Axencia Galega de Desenvolvemento Rural está a investigar a titularidade e revisión do parcelario no polígono agroforestal de Solbeira, no concello de Paderne de Allariz, cos traballos de levantamento topográfico.

Os resultados destes labores permitirán actualizar o catastro da zona, así como avanzar no proceso de aprobación e posta en marcha desta iniciativa, enmarcada na Lei de Recuperación da Terra Agraria de Galicia e que abrangue unha superficie de 43,36 hectáreas, distribuídas en 317 parcelas de máis de douscentos propietarios.

Este é un dos 29 polígonos agroforestais de Galicia, que se atopan en diferentes fases de execución e que supoñen a mobilización de máis de 9.300 hectáreas en toda a comunidade de Galicia.

Inicialmente os técnicos realizarán labores de levantamento de infraestruturas comúns, límites físicos e elementos naturais, para posteriormente analizar cos titulares as posibles discrepancias detectadas entre a cartografía existente e a realidade física das parcelas incluídas dentro do perímetro do polígono.

As reunións informativas serán convocadas nos próximos días, onde identificaranse as datas e lugar de atención aos veciños interesados. Para isto, levaranse a cabo reunións informativas cos propietarios, co fin de recoller os seus datos e a documentación acreditativa da titularidade das parcelas nas que existan discrepancias entre a información existente e a situación real dos predios.

Como resultado dos traballos, deberán obterse todos os datos relativos a quen posúe a parcela en concepto de dono, ás súas cargas e os gravames e situacións xurídicas.