Premio a catro décadas de humor e retranca

O Festival Internacional de Curtas de Comedia de Allariz (RiR) celebrou onte a súa gala de clausura, que puxo fin a 8 días de cine na vila alaricana, cunha emotiva homenaxe á obra de Xosé Lois González, “O Carrabouxo”, xa que o autor recibiu o Premio RiR Contigo desta oitava edición polas súas máis de catro décadas de viñetas cheas de humor e retranca en La Región.

A gala de clausura desta edición estivo conducida por Isabel Risco, e nela fíxose a entrega de premios ás mellores curtas deste ano, elixidas polo xurado, e o premio do público, que este ano recaeu na curtametraxe La Mort, de Jesús “Nota” Martínez.

Dentro das diferentes categorías, a curtametraxe máis laureada foi “Trece Gatos”, que recibiu o premio “Cruz Risco” ó mellor guión para David Gaspar e Elena Garrote, e á mellor interpretación para Ariadna Llobet.

A mellor curtametraxe de ficción deste ano foi “La reina del pop”, mentres que a mellor curta de animación recaeu en “Cortes tontos”. O recoñecemento á mellor dirección foi para Aurélien Laplace, ca súa curta “Le Dérapage”.

Na categoría de mellor curta documental ou mockumentary a gañadora foi “La Boda”, de Andrea Bilbao, cunha mención especial do xurado a “Selftape”, de Sergio Álvarez.

Xosé Lois González, “digno sucesor de Castelao”, como dixo Isabel Risco, recibiu o premio RiR Contigo desta edición, e fixo unha reivindicación do humor e o moito que se castiga, porque “a risa é un símbolo de intelixencia”.

Óscar Doviso, director do festival, explicou que este ano “subimos o número de espectadores”, o que consideran “moi positivo”.

Pola mañá tivo lugar a presentación de “El universo de Jack Lemmon”, que contou coa participación de Jaime Iglesias e Carlos Gurpegui. Á hora do vermú, o colectivo escénico TIC interpretou a danza-teatro “Ou” na Praza Maior da vila, unha peza-homenaxe ó Carrabouxo. Xa pola tarde, o albergue alaricano acolleu a estrea da serie “Delirio sketchs”, de Bea Saiáns, e a retransmisión da serie do Carrabouxo de Lhosca Arias.