Amoeiro premiará aos seus veciños máis comprometidos

Amoeiro lanza a primeira edición dos seus Premios, froito da colaboración público-privada, cos que distinguirá a veciños do municipio que loitan polo ben común. O Concello e as empresas Amoeiro Rincón, Avícola Amoeiro e Tanatorio Orensano detallaron ponte as bases duns galardóns que buscan recoñecer as achegas da veciñanza.

O alcalde, José Luís González, xunto a representantes das empresas locais patrocinadoras e organizadoras —Amoeiro Rincón, Avícola Amoeiro e Tanatorio Orensano—, desvelaron os pormenores duns galardóns que nacen para “recoñecer a aqueles veciños e veciñas que contribuíran positivamente ao ben común da comunidade”.

Na presentación subliñouse a clara división de responsabilidades: as tres empresas asumirán a organización integral do evento, mentres que o Concello colaborará cedendo o espazo para a gala -que será no Campo do Souto o no pavillón-, o mobiliario necesario e a organización dun cóctel final no que se exaltarán os produtos locais.

Proceso secreto

Un dos aspectos máis destacados do regulamento é o minucioso proceso de elección para manter o suspense ata o último momento. As candidaturas, que deberán ter un vencello demostrado con Amoeiro, serán propostas polos grupos políticos con representación municipal e as empresas antes do 25 de agosto para esta primeira edición.

Posteriormente, o 6 de setembro, reunirase un xurado plural composto por membros das empresas organizadoras, un representante de cada partido político, a dirección do CEIP Ramón Otero Pedrayo, a presidencia da Fundación Otero Pedrayo e o Brigada da Garda Civil de Tamallancos.

A votación será secreta e en sobre pechado. Todos os votos gardaranse nun único sobre que será custodiado persoalmente polo alcalde ata o inicio da gala. O reconto realizarase xusto antes da cerimonia, en presenza do xurado. En caso de empate, as empresas organizadoras terán un voto de calidade.

Gala o 13 de setembro

A primeira gala de entrega celebrarase o vindeiro 13 de setembro. O premio consistirá nun ramo de flores e un trofeo co logo do Concello. De cara a vindeiras edicións, a intención é fixar a data no primeiro sábado de xuño e mesmo incorporar novos concursos abertos a toda a cidadanía.