Carlos Valle: “A Pantalla é o símbolo máis importante de Xinzo, debe respectarse”

A Asociación A Pantalla, que conta con 188 socios -115 adultos e 73 infantís-, está neste 2021 de aniversario -fundouse hai 25 anos- e tamén vén de estrear nova directiva. Trátase dun proxecto que liderará Carlos Valle, quen viste o emblemático traxe dende os cinco anos, e que procurará seguir difundindo o respecto pola tradición entroideira e pola figura da Pantalla. O presidente xa pensa no día 5 de febreiro e en recuperar o Entroido.

Como afronta esta nova etapa como presidente da Asociación A Pantalla?

Hai un cambio de presidencia, aínda que cinco dos membros da actual directiva xa estabamos na anterior. O obxectivo pasa por continuar co traballo feito nos últimos catro anos. Seguir na mesma liña, introducindo ideas novas. O traballo, ata o momento, está ben feito.

Cara onde se dirixe o traballo da asociación?

A darlle valor á parte tradicional do noso Entroido e a protexer a nosa máscara.

Ven resultados dese traballo feito na liña do respecto ao traxe, á Pantalla e á tradición?

Levamos moitos anos facendo charlas nos colexios e institutos e ofrecendo todo tipo de información neste senso. Pouco a pouco vemos ese traballo reflexado, aínda que hai que seguir mellorando. O importante é que a xente cada vez saia mellor co traxe. Sempre hai quen non ten un comportamento axeitado ou vai mal vestido, pero eu non son ninguén para decirlle nada. O noso papel é promover o respecto aos que veñen detrás -refírese aos máis cativos-. Esto é algo que se leva facendo dende sempre, eu mesmo recibín charlas cando era pequeno.

En todo caso, por que é importante que a xente se conciencie no respecto?

Para non perder a nosa tradición e os nosos valores. É importante vestir ben, comportarse ben e non quitar a máscara fóra dos bares. É importante tratar a máscara con consideración e saber o que é: o símbolo máis importante de Xinzo. Cando eu visto a Pantalla non son Carlos, son unha Pantalla e teño que comportarme como tal, ademais de ter unha actitude e respecto ao que levo posto.

Que tipo de actividades prevén para o vindeiro ano?

Ademais do colgamento do Meco e o Domingo Oleiro, a sega, a malla e tentar recuperar as charlas que facíamos antes da pandemia no Museo Galego do Entroido, aínda que buscando outros espazos. Tamén recuperaremos as cotas dos socios que, debido a interrupción da nosa actividade pola pandemia, deixamos de pasalas.

Como está o relevo xeneracional para vestir o traxe?

Temos bastantes socios na categoría de Infantil. A tradición vaise transmitindo dos uns aos outros. Eu empecei con cinco anos.

Cre que afectou a esta tradición o feito de non poder celebrar o Entroido este ano?

Cremos que vai a seguir igual e que a xente ten ganas de volver á normalidade.

Que sentiu vostede ao non poder vestir a Pantalla este ano?

Tristeza. De feito, nuns días cumplo anos e sempre digo que este ano non o celebro porque tampouco houbo Entroido, entón non conta. (Engade entre risas).

Este ano hai Entroido?

Neso estase traballando.