O CDR “O Viso” gaña o Agader na categoría de interese social

O Centro de Desenvolvemento Rural “O Viso” recibiu o premio ao Desenvolvemento Rural de Galicia na categoría de interese social. O acto de entrega de distincións tivo lugar en San Domingo de Bonaval. Máis de medio cento de candidaturas presentáronse a algunha das oito categorías: de mocidade, para persoas de menos de 40 anos; paisaxe rural, para iniciativas de intervención, mellora e posta en valor das paisaxes rurais produtivas de Galicia nas que se integren os elementos e valores culturais e naturais co aproveitamento agrario; de interese social, para aqueles proxectos orientados á integración de colectivos desfavorecidos ou do coidado dos maiores; categoría de turismo; do sector agro gandeiro; de mulleres, para iniciativas levadas a cabo ou encabezadas por elas; de innovación tecnolóxica e, por último, de recuperación e posta en valor da terra agraria.

O acto foi organizado e guiado por Xiana Albor, comunicadora ambiental, e a primeira en tomar a palabra foi Inés Santé (directora de Agader), que entre outras cousas agradeceu a nutrida presenza de autoridades (secretarios xerais, directores xerais, delegado da Xunta en Ourense e conselleiro de Medio Rural) e o recoñecemento ós proxectos singulares presentes.

Tras lembrar as máis de 90 iniciativas xa recoñecidas dende o 2003 na que naceron estes premios, pasaron a ir dicindo as dúas finalistas en cada categoría, para inmediatamente descubrir o proxecto gañador coa entrega dun galardón.

A dotación orzamentaria total que destina a Consellería do Medio Rural a estes galardóns é de 80.000 euros, a razón de 10.000 euros para cada un dos gañadores participantes nas oito categorías establecidas.

O obxectivo destes premios é recoñecer por parte do Goberno galego aquelas iniciativas que contribúan de xeito singular a promocionar o medio rural e a xerar unha sociedade rural máis dinámica e cohesionada.

O acto contou con dúas actuacións, a do Mago Teto e a de Catuxa, e rematou coa intervención do Conselleiro de Medio Rural, José González, que falou do acto coma “un evento especialmente querido” e fixo un percorrido por cada unha das experiencias gañadoras e unha referencia cando falou do CDR O Viso a “unha comarca tan extraordinaria como a Limia”.