Alba de Evan e Xabier Domínguez: "Para escribir xuntos é importante a empatía e o traballo en equipo"

Alba De Evan e Xabier Domínguez son unha parella de escritores que veñen de lanzar a súa obra número 20. A cabalo entre Vilar de Barrio e Ourense, estes mestres somerxéronse na aventura de escribir para os cativos, e aqueles que non o son tanto.

“Segredos soterrados” é o seu último libro.

Si, é unha historia de aventuras, onde a actualidade mestúrase co pasado a través de saltos temporais que van fiando a trama. Introducimos así á cativada nun episodio da nosa historia un tanto descoñecido: a presenza dos nazis en Galicia durante a ditadura. Entre os acontecementos que abordamos está o accidente de avión que tivo lugar en Calvos de Randín hai 70 anos, do que se conservan restos da fuselaxe nalgunhas portas do lugar. Unha trepidante aventura que viaxa á II Guerra Mundial e descobre a presenza nazi en Galicia, os tesouros agochados no subsolo e as tramas de corrupción que manexan o mundo. Apto para lectores de 10 a 99 anos.

É o seu libro número 20. Que supón isto para vostedes?

A verdade é que para nós é un soño que se cumpre, non porque soñásemos en publicar tanto, senón porque excede todas as nosas esperanzas no mundo da literatura. Gozamos moitísimo do proceso da escrita, pero o mellor é ver como esas historias que escribimos chegan aos seus lectores, que as aprecian e as desfrutan. A resposta dos lectores é excepcional e nunca viviremos o suficiente para agradecer a acollida que teñen as nosas obras, así como o agarimo co que nos tratan as libreiras, mestras e demais implicados.

Cando comezaron a publicar?

Pois a verdade é que foi un proceso natural, os dous estabamos de profes no mesmo centro educativo, e colaborábamos nun proxecto medioambiental. Escribimos catro contos para animar aos peques a participar no proxecto e fomentar a reciclaxe e valores ecolóxicos….gustáronlles tanto que pensamos que podería ter saída con algunha editorial. Así naceu a colección de contos Naturizo, e comezamos a escribir máis en serio.

Que é a colección Miudiños?

A colección Miudiños é un proxecto que lanza a editorial Cumio de Pontevedra, que consiste en crear biografías de personaxes destacados da nosa historia para primeiros lectores. Están escritos a xeito de Biopoema: biografías en poema. Editados con moito xeito e ilustrados fermosamente por Bea Gregores. Comezamos a colección con Rosalía e Luís Seoane. En vindeiros números haberá sorpresas.

Novos proxectos en mente?

Para este ano en curso temos o debut en solitario de ambos: Alba pola súa parte publicará con Xerais unha novela infantil- xuvenil, e Xabier un libro CD infantil xunto con Pakolas coa editorial Embora. En conxunto para o ano que ven, xa temos algunha novela en marcha na que están traballando na corrección e ilustración.

Como é escribir xuntos?

Como en calquera partitura de piano a catro mans, é moi importante a empatía, a sincronización, e o traballo en equipo. Comezamos cunha choiva de ideas en común, creamos un pequeno argumento xeral e organizámonos. Escribimos por quendas, cada un le e revisa o escrito anteriormente polo outro. Ás veces é complexo uniformar o estilo ou concretar o curso de acción, pero á vez pensamos que a escrita conxunta enriquece a nosa creación, dándolle novos matices, pagando a pena todo o traballo.