Nace en Vilar de Santos a Asociación de Artesáns Limiar

Este sábado será a presentación oficial da asociación no Museo da Limia de Vilar de Santos -11,30 horas-, lugar no que se desenvolverán a maior parte das súas iniciativas tanto de tipo formativo de obradoiros, como de exposición e venda.

Co obxectivo de crear, producir, investigar e estudar bens artesanais, velando pola difusión, conservación, innovación, defensa e promoción da artesanía galega vén de fundarse en Vilar de Santos a Asociación de Artesáns Limiar, unha agrupación de 10 artesáns que contará co respaldo do Museo Etnográfico da Limia. 

A asociación, que estará liderada por Mercedes Vieites Pérez -costureira natural de Vilar de Santos-, desenvolverán a actividade nos eidos da cestaría, olaría, instrumentos musicais, pantalla, costura, filigrana e prataría. 

Este sábado será a presentación oficial da asociación no Museo da Limia de Vilar de Santos -11,30 horas-, lugar no que se desenvolverán a maior parte das súas iniciativas tanto de tipo formativo de obradoiros, como de exposición e venda. Precisamente, neste lugar a agrupación contará cun espazo permanente e nel poderá vender as súas obras os sábados e domingos de 11,30 horas a 13,30 horas e de 16,00 horas a 18,00 horas. 

PROMOCIÓN DA LIMIA

A Asociación Limiar tamén colaborará nas iniciativas de investigación, difusión e conservación que, en materia de artesanía, se leven a cabo no Museo Etnográfico da Limia. Promoverá a formación de profesionais no ámbito da artesanía e elaborará unha programación estable  vencellada á actividade artesanal no mencionado museo. 

Por outra banda, dende esta agrupación aunarán esforzos para a protección do patrimonio cultural artesán, especialmente, da Comarca da Limia e propiciará o intercambio de experiencias e información con outras entidades artesanais. 

Por último, encargarase do desenvolvemento dun fondo documental artesanal con sede no Museo da Limia.

Te puede interesar