O obradoiro de emprego de Xinzo e Sandiás visita empresas

Os participantes no obradoiro de emprego “Emprego do Peregrino” veñen de realizar unha serie de visitas a negocios da zona da Limiacomo parte da súa formación.

As empresas ás que acudiron as persoas que estiveron estes meses desenvolvendo as súas aptitudes están relacionadas co mundo da carpintería e da xardinería.

Deste xeito, búscase ao remate do obradoiro a inserción laboral dos participantes no sector empresarial no que se estiveron formando, neste caso grazas ás prácticas de traballo que levaron a cabo.

Os alumnos e alumnas do obradoiro quedaron “moi contentos” coas visitas guiadas e de formación que realizaron, e das que sacarán “moito proveito”. Alén disto, aproveitaron a ocasión para agradecer a atención prestada polos responsables das empresas visitadas.

Doce meses

Os concellos de Sandiás e de Xinzo de Limia volveron unir as súas forzas este pasado ano para solicitar conxuntamente este obradoiro de emprego, cunha duración de doce meses, e que ofrece prácticas de traballo e cursos de formación a 20 alumnos de ámbalas localidades.

Xinzo e Sandiás están a aproveitar este obradoiro para realizar novas obras de acondicionamento e mantemento nas vilas, favorecendo á vez a inserción laboral de persoas desempregadas.