O Concello de Xinzo de Limia celebrou un pleno extraordinario no que houbo unha participación veciñal que tiña que ver cun dos asuntos tratados, o referido á elección dos compoñentes das mesas electorais de cara ás eleccións galegas do 18 de febreiro.
Precisamente por iso os veciños de Laroá decidiron tomar parte activa e expoñer o seu malestar pola eliminación da mesa electoral da sua localidade, o que consideran coma “un ataque ó rural”. Fixeron ver carteis reivindicativos nos que se podía ler: “Nin unha mesa menos no rural” , “Quero votar en Laroá”, “Pois que cambien a lei electoral” ou “Que fixestes para evitalo”.
O grupo de goberno anunciou que presentará unha moción en defensa destas reclamacións, co obxectivo de que as administracións competentes reduzan a cota mínima para a constitución dunha mesa electoral, que actualmente está en 200 votantes.
Coidados a domicilio
A maiores, no pleno aprobouse a adxudicación do maior contrato de axuda a domicilio na historia do Concello de Xinzo, co voto favorable de tódolos grupos políticos. O Concello aumenta un 10 % o orzamento destinado ás axudas a domicilio, o que supón o maior investimento en coidados na historia deste Concello, con 881.000 euros anuais.
Segundo o alcalde de Xinzo de Limia, Amador Díaz, o que se pretende é “seguir dando máis e mellores servizos, á vez que traballamos por reducir a cero ese tempo de agarda, que sería marabilloso para a calidade de vida das nosas persoas maiores e para que poidan seguir quedando nas súas casas”.
Esta modificación que se vai a solicitar, segundo o Concello de Xinzo de Limia, podería beneficiar a moitos pequenos lugares do rural, non só de Xinzo, senón tamén do resto de Galicia e de España.n
