A Torre de Porqueira sufrirá novas actuacións para a súa mellora

Logo das actuacións realizadas no entorno da Torre de Fírbeda ou da Forxa, en Porqueira, centradas en mellorar os accesos e a iluminación, a Xunta de Galicia vén de publicar a licitación das obras de consolidación e conservación do ben cultural por un importe de 53.000 euros. Será, concretamente, a área de Cultura e Turismo a que se encargue de realizar esta intervención.

Segundo informaron dende a Consellería, realizouse unha análise pormenorizada que permitiu detectar no inmoble diversas patoloxías en relación co estado actual da cuberta e da carpintería. Asimesmo, eliminarase a carpintería metálica da cuberta e as tellas e placas de fibrocemento con amianto. Realizarase o illamento térmico, cubrirase a cuberta con tella cerámica curva, colocarase unha nova carpintería de madeira e substituirase o pararraios existente, entre outras.

A Torre de Fírbeda, tamén coñecida comunmente como Torre de Porqueira, forma parte das torres defensivas da comarca da Limia, entre as que se atopan a Torre de Pena en Xinzo, a Torre do Castro en Sandiás e a Torre de Celme en Rariz de Veiga. Conserva a súa apariencia orixinal do século XII.