O Concello de Vilar de Santos vén de rematar a fase inicial para a recuperación paisaxística e patrimonial da aldea de Saa, de interese etnográfico e arqueolóxico.
O plan contou cunha axuda da Axencia Galega de Desenvolvemento Rural que ascendeu a 29.505,92 euros -o Concello de Vilar de Santos contou cunha porcentaxe de axuda do 80 por cento, é dicir, 23.189,20 euros- e que permitiu acometer actuacións de saneamento, recuperación paisaxística e de mellora do entorno sobre todo o conxunto, así como sobre cada unha das edificacións en particular.
Unha das intervencións centrouse no coñecido como Parque Didáctico SApere Aude, un espazo que pretende emerxer como un enclave para a divulgación da experimentación e aprendizaxe do pasado. A actuación realizada, tal e como informaron dende o Consistorio, ten como finalidade crear un entorno atractivo para colectivos da infancia e da xuventude no que se poida coñecer como eran os procesos de elaboración e uso de ferramentas no pasado. Tamén os tecidos, a cerámica, os oficios, o traballo no agro ou a relación co medio.
A actividade neste centro complementará a outras iniciativas e temáticas expostas no Museo Etnográfico da Limia, situado a poucos metros de Saa. Os dous espazos actuarán, en definitiva, como elementos complementarios para unha mesma visita didáctica ao lugar. Precisamente, con esta finalidade organizarase nos próximos meses un congreso e un campo de voluntariado internacional.
PROBLEMA DE SEGURIDADE
Un dos obxectivos fundamentais desta intervención non é outro que o de rematar cos problemas de seguridade e salubridade, que o abandono do proxecto de recuperación do espazo e dos seus inmobles -a comezos do XXI asinouse un convenio entre a Consellería de Industria da Xunta de Galicia e o Concello de Vilar de Santos, que non chegou a rematarse- estaba ocasionando. Ditas instalacións sufriron ataques vandálicos e roubos.
Logo da actuación, o alcalde de Vilar de Santos, Antonio Míguez, comprometeuse “a encher de vida” este enclave.
