O Viso traballa a prol do envellecemento activo na Limia

Fernando González Abeijón, director xeral de Maiores e Persoas con Discapacidade, visitou este xoves as instalacións do Centro de Desenvolvemento Rural O Viso -pertencente á entidade Terra e Xente, que ten como obxectivo acompañar ás persoas afincadas no rural, desde os máis pequenos ata os máis maiores- en Sarreaus. González Abeijón, que puxo en valor o traballo realizado polos seus profesionais, percorreu as instalacións e puido coñecer diferentes espazos como a vivenda comunitaria, a cociña, ou o comedor social, entre outros. Ademais coñeceu de primeira man os programas levados a cabo neste centro, como o de Aldeas activas e saudables, ao que a Xunta de Galicia achega máis de 50.000 euros e que se centra na promoción da autonomía, prevención da enfermidade, loita contra o illamento e soidade e no empoderamento das persoas maiores do rural.

O director xeral de Maiores e Persoas con Discapacidade destacou o labor levado a cabo por estas entidades que traballan no envellecemento activo, na participación social e na prevención da dependencia das persoas maiores que viven no medio rural. Ademais, González destacou que este foi un dos colectivos que se viron “máis afectados” durante este ano de pandemia e que agora “é o momento de recuperar todas as actividades” que ata este momento non se puideron levar a cabo polos protocolos de prevención sanitarios.