“Xinzo ten moito que dicir no que se refire a música tradicional. Quedou demostrado esta fin de semana coa celebración do Certame Celtibérico de Bandas, que volveu á vila 20 anos despois cun gran éxito, tanto de participación como de visitas rexistradas”, anotan dende o Concello. Ante isto, a capital limiá reivindica que Xinzo de Limia é o escenario “idóneo” para a súa celebración e postúlase para ser sede permanente deste evento en, polo menos, algunha das fases.
Dende o ente municipal destacan tamén que os grupos locais “triunfaron” nesta edición e aplaudiu a calidade de todos os participantes. A Banda de Gaitas conseguiu o primeiro posto en dúas das catro categorías e Cidade de Antioquía logrou o segundo posto en segundo grao. “Este evento foi a ocasión perfecta para demostrar que o concello pode albergar un evento musical desta categoría, xa que Xinzo tamén é terra de gaiteiros”, destaca a alcaldesa, Elvira Lama.
Ademais, o Certame Celtibérico de Bandas converteu á localidade na capital da gaita e milleiros de persoas foron testemuñas. A ocupación rozou o 100% nos hoteis de toda a comarca e a súa celebración durante toda a fin de semana deu tamén empuxe aos locais hostaleiros. “Temos que apoiar aos nosos comerciantes e hostaleiros ao mesmo tempo que colocamos ao concello no foco internacional”, engadiu Lama.
