A tecnolóxica galega Xoia Software Development e o Concello de Baños de Molgas presentan hoxe, ás 10,00 horas, na explanada da Antiga Estación de Ferrocarril, unha aplicación de realidade aumentada para poñer en valor os recursos turísticos e patrimoniais do municipio. Esta aplicación guiará aos turistas e visitantes polos recursos patrimoniais e turísticos do municipio así como pola súa historia, dende A Burga pasando polo Castro de Acea ou o propio Museo Moncho Borrajo, entre outros.
Esta APP, denominada Visita Molgas, está dispoñible de balde para Android e iOS e guiará, mediante GPS, ao visitante ata os distintos puntos de referencia. Unha vez chegados a cada un deles, enfocando coa cámara do dispositivo móbil ás peanas instaladas, os usuarios poderán ver e escoitar como Nymphis, a nosa guía particular en realidade aumentada, protagonista da historia do concello, explica a súa historia a través de animacións 3D, reconstruccións arqueolóxicas e monumentos reproducidos con fotogrametría – copias hiperrealistas virtuais do patrimonio real–, creando así unha experiencia interactiva, inmersiva, pedagóxica e divertida, que permitirá aos visitantes de Baños de Molgas, empaparse da súa historia dunha maneira única.
