Unha ducia de establecementos da vila alaricana uniranse de cara ao vindeiro fin de semana para celebrar "Allariz é oportunidade", un evento no que haberá descontos e o sorteo de tres lotes de produtos elaborados no municipio.
Dende o 19 ao 21 de marzo, coincidindo coa celebración de San Xosé, os clientes que se acheguen aos locais participantes poderán atopar ofertas e descontos dunha gran variedade de produtos que inclúen moda, calzado, deportes, roupa infantil, complementos ou fotografía. O obxectivo pasa porque os responsables destes locais rematen os seus excedentes da tempada outono e inverno e os visitantes poidan atopar descontos que, segundo manifestaron dende o Concello de Allariz, "merecerán a pena". María López, Concelleira de Promoción Económica Comercio e Turismo, quixo agradecer ao sector "o seu esforzo nestas circunstancias tan complicadas, xa que a súa labor é vital para que Allariz siga sendo un lugar atractivo para vivir e para visitar". Haberá límite de aforo ao 50 por cento e será pbrigatorio empregar máscara e xel desinfectante.
