Os fornos de Niñodaguia darán vida á cerámica

Unha das datas subliñadas en vermello na provincia en cada primavera é a Fornada tradicional e Fiadeiro de Niñodaguia, unha cita de grande interese etnográfico que amosa o xeito no que o fío, a cerámica e os fornos tradicionais teñen a súa raiz nesta localidade de Xunqueira de Espadanedo.

A terceira entrega deste evento vivirase o vindeiro 1 de abril e contará con actuacións musicais e o emblemático acendido dos fornos e fiadeiro, así coma un xantar popular.

A xornada, organizada pola Asociación Cultural Amigos do Barro de Niñodaguia, a Asociación de Veciños de Niñodaguia e a Comisión de Festas de Niñodaguia, forma parte do programa “Días Europeos da Artesanía”, coordinado pola Fundación Artesanía de Galicia. Conta tamén coa colaboración do Museo Taller de Olería de Niñodaguia e do Concello de Xunqueira de Espadanedo.

A programación prevista para a mencionada data foi presentada este xoves en Ourense da man do vicepresidente segundo da Deputación, César Fernández; o presidente da Asociación Cultural Amigos do Barro de Niñodaguia, Agustín Vázquez e a representante da Asociación de Veciños de Niñodaguia, Rosa María Gallego.

Os fornos acenderanse a partir das 11,00 horas do vindeiro día 1, momento no que dará comezo a actividade artesá. Logo da sesión vermú que ofrecerán Os do fuelle, terá lugar o xantar popular. Para participar será necesario anotarse previamente e o prezo da inscrición -12 euros a xeral, gratis para os menores de seis anos e oito euros para os que teñan entre seis e 12 anos- incluirá un prato e unha cunca da alfarería tradicional de Niñodaguia.