Ó longo da xornada déronse cita un cento de persoas na aldea natal de Rochi Nóvoa
Xunqueira de Ambía disfrutou onte da xa quinta edición do Tangaraño Cultural, unha celebración que une música, tradición e cultura, xunto con actividades recreativas e de ocio na aldea de Sobradelo.
Ao longo da xornada, sucedéronse as actividades, como actuacións musicais, recitais de poesías, contos e música para rapaces, que remataron pola noite con máis música e queimada, que xa cáseque institucionalmente elaboran Manuel Nóvoa e Antonia Vázquez. Non faltaron tampouco nesta edición do evento os xogos populares para os máis cativos. Os asistentes tiveron a oportunidade de disfrutar do xantar que a prezos economicos ofrecía a organización.
O Tangaraño Cultural é unha iniciativa da poeta ourensán nada na localidade de Sobradelo, Rochi Nóvoa, que quixo xuntar unha vez ó ano á meirande parte de todos aqueles integrantes dos círculos poéticos e musicais da provincia e de fóra dela nunha xornada de convivencia aberta aos veciños da aldea e a todos os que ata alí se quixeran achegar.
