O Festival Internacional Rebulir 2023 (FIR 2023) celebrou a súa gala central no polideportivo do Picouto, sendo un dos certames referentes da cultura galega e tamén unha ventá aberta ás diferentes culturas do mundo.
Despois das dúas primeiras xornadas de actividades paralelas, a gala foi o prato forte dun festival que tivo máis presenza que nunca nas rúas da comarca de Celanova e tamén na cidade de Ourense. O festival das culturas do mundo celebrouse con máis de 700 asistentes á gala, que foi conducida polos artistas Caldas e Mancho.
Despois de proxectar o vídeo promocional do Concello de Ramirás comezaron as actuacións dos grupos Coros y Danzas El Miajón (Extremadura), Rancho Folclórico do Cartaxo (Portugal), Caporales San Simón Usa (Bolivia) e Mbolo Mooye Doole (Senegal); e do grupo anfitrión Rebulir e a Banda de Música de Ramirás, que por primera vez fixeron un espectáculo xuntos.
O folclore intercultural tivo protagonismo neste evento no que a Xunta de Galicia e o Concello de Ramirás quixeron ter unha lembranza especial aos migrantes galegos en Suiza e recoñecer o seu labor como transmisores da cultura galega lonxe do seu fogar. Purificación Blanco e Jesús Lorenzo, representantes dos emigrantes en Suíza, recolleron o premio de mans de Antonio Rodríguez Miranda, secretario xeral de Emigración.
Galardones
Tamén foron entregados os Premios Rebulir da Cultura Galega 2023, cun dos momentos álxidos como foi a entrega por parte de Gabriel Alén, delegado territorial da Xunta en Ourense, do Premio Artes Escénicas ao actor Luís Zahera pola súa traxectoria profesional no cinema galego e nacional, que mostrou o seu agradecemento a través dun vídeo. O Premio Música Galega foi para o grupo Xurxo Fernandes, que entregou o director xeral de Cultura da Xunta de Galicia, Anxo Lorenzo. Por último, Luis Menor, presidente a Deputación de Ourense, entregou o Premio Homenaxe, ao programa da Radio Galega, “Lume na Palleira”.
A organización do festival deu as grazas a tódolos colaboradores e patrocinadores e polo apoio institucional das administración públicas. Así mesmo o director artístico do FIR, Alexandre Sotelino, fixo mención ao Parlamento de Galicia; Consellería de Cultura, Educación e Universidade; Secretaría xeral de Cultura; Secretaría xeral de Emigración; Secretaría xeral de Política Lingüística; Dirección xeral de Participación, Voluntariado e Xuventude; Deputación de Ourense; INORDE; Concello de Ramirás; Concello de Celanova e ás Universidades de Vigo e Santiago de Compostela, entre outros.
Dese xeito, baixou o telón o FIR 2023, que celebrou a súa maioría de idade no panorama cultural galego, buscando o que une ás diferentes culturas do mundo.
