Fuxan Os Ventos tocarán no acto central de Rebulir

Catro compañías internacionais e tres galegas, incluido o grupo anfitrión, mostrarán o seu folclore no Festival Internacional Rebulir, que dende onte e ata o domingo 18 converterá a Ramirás no epicentro da cultura de raíz. A gala central de mañá sábado, ás 19,00 horas, no polideportivo de “O Picouto”, estará conducida por Rubén Riós e Patricia F Santana, e nela, ademáis das actuacións dos grupos, Alba Faro e Álvaro Pérez farán unha homenaxe aos premiados na categoría de música, Fuxan os Ventos, que finalmente, tamén tocarán no evento central. Xosé Méndez Ferrín (Premio Homenaxe) e Celso F. Sanmartín (Artes Escénicas) serán os outros dous premiados da edición, no que se fará un recoñecemento a comunidade emigrante por parte do Concello e o Consello da Cultura Galega.

A Asociación Cultural Rebulir presentou onte unha nova edición, a número 17, que 2022 rompe récords trala pandemia: máis actividades paralelas, máis artistas e máis público. “Rachamos récord en número de artistas e en número de asistentes á gala, con máis de 700 entre artistas e público; en número de organizadores e tamén co número de actividades paralelas dentro da comarca e na capital ourensá, que foron un éxito e teñen todas as prazas cubertas”, dixo o director do festival, Alexandre Sotelino, que estivo acompañado polo vicepresidente primeiro da Deputación, Rosendo Fernández; a directora xeral de Xuventude, Cristina Pichel; o delegado territorial, Gabriel Alén, e a alcaldesa de Ramirás, Isabel Gil.

A programación, que xa arrancou pola tarde no Espazo Xove, continuará hoxe en Ramirás con espectáculos no colexio e na residencia e, pola noite, foliada itinerante en Celanova e Ramirás.