Naila María González gaña o premio Acouga Casa dos Poetas

O Hotel Acouga Boutique e a Fundación Curros Enríquez de Celanova daban a coñecer onte o nome da persoa gañadora da primeira edición do Premio de Poesía Acouga Casa dos Poetas e que desfrutará dunha viaxe para dúas persoas a Riviera Maya. Trátase da poeta sarriá Naila María González, recentemente distinguida co Francisco Añón, autora do traballo “A anarquía das pálpebras”.

O xurado, confirmado por Baldo Ramos, Chema Paz Gago, María Xosé Porteiro e Felipe Ferreiro, que actuou como secretario con voz pero sen voto, destacou o poemario “de voz transparente e asequible, que atopa os motivos literarios no amor e na vida cotiá, escrita cunha lingua desenfadada, pero tratada con elegancia, e un ritmo traballado que abeira cada poema ao mundo da música pop e á poesía da experiencia”.

Unha ducia de traballos se presentaron ao certame, que xurde coa vocación de colaborar na consolidación de Celanova como unha das principais vilas literarias de Galicia, que concedeu sendos accésits á poeta de Xunqueira de Ambía Rochi Novoa e a María Rodríguez, da Pobra do Caramiñal.

O acto de entrega do premio será o 14 de setembro, véspera do aniversario de Manuel Curros Enríquez.