Manuel Fernández Fernández, coñecido por Pahiño, que militou, entre outros equipos, no Real Madrid, o Deportivo e o Celta de Vigo nas décadas dos 40 e 50 e chegou a ser internacional coa selección española, faleceu na pasada madrugada aos 89 anos de idade en Madrid.
Pahiño, que naceu en Vigo no día 21 de xaneiro de 1923, foi o máximo goleador da Liga española en dúas ocasións, ambas coa camiseta do Real Madrid, en 1948 e 1952.
Antes de militar no conxunto branco, do que formou parte entre 1948 e 1953, Pahiño pasou polo Navia, o Arenas de Alcabre e o Celta de Vigo, co que superou os cincuenta goles.
Marcou máis de cen co Real Madrid, debutou coa selección española, e en 1953 desembarcou no Deportivo da Coruña, que hoxe informou do óbito na súa páxina web oficial.
Recorda o club galego que Pahiño, quen anotou preto de cincuenta goles como deportivista, se fixo famoso na Coruña polo seu gol ao Athletic de Bilbao na prórroga da final (2-1) do Trofeo Teresa Herrera, decano dos torneos estivais, no día 1 de setembro de 1955 no estadio de Riazor.
Aquel foi o primeira Teresa Herrera que conquistou o Deportivo, do que Pahiño se desligou ao final desa mesma tempada, no ano 1956.
A carreira do futbolista vigués, que será incinerado mañá mércores no tanatorio da M30 en Madrid, acabou no Granada no ano 1957.
