O Entroido de Xinzo reforza a videovixilancia

O Concello de Xinzo de Limia reuniuse onte a mañá cos corpos de seguridade e emerxencias nunha xunta de seguridade para acordar as medidas que se levarán a cabo durante a celebración do Entroido 2025.

O Plan de Autoprotección do evento, igual que en anos anteriores, establece protocolos de prevención e resposta ante posibles incidencias a través da coordinación entre os distintos corpos de seguridade e emerxencias que actuarán no Concello durante o mes de festexos.

Durante o Entroido, o dispositivo de seguridade estará formado polo Parque de Bombeiros de Xinzo de Limia, Protección Civil, Policía Local, Garda Civil e Garda Civil de Tráfico. Tamén estarán efectivos da Cruz Vermella e do CIM e un posto médico de auxilios.

Ao ser recoñecido o Entroido como Festa de Interese Turístico Internacional prevese unha gran afluencia de persoas comezando xa o sábado día 8, polo que a Axencia Galega de Emerxencias instalará o camión de posto de mando avanzado para facilitar a resposta ante calquera eventualidade. O alcalde, Amador Díaz, recorda que “o Entroido é unha festa de todas e todos, e para iso é fundamental o respecto”.

A videovixilancia tamén se intensificará nos puntos estratéxicos da vila para garantir a seguridade tanto para os veciños como para os visitantes destas datas.

Novidades

Unha das principais novidades deste ano é a ampliación da furgoneta violeta, que velará pola seguridade das mulleres ante agresións machistas e que, ademais de estar operativa nos días grandes do Entroido, estará presente tamén no Petardazo.