O Diario Oficial de Galicia publicou este martes dúas ordes de axudas destinadas a promover o emprego autónomo ás que a Consellería de Traballo destinará 15,3 millóns de euros co obxectivo de beneficiar a 3.300 autónomos galegos.
Unha delas está destinada a autónomos menores de 30 anos, mentres que a outra se centra nos maiores desta idade.
Os interesados terán de prazo ata o 30 de setembro para presentar a súa solicitude. En concreto, subvencionaranse as altas como autónomos que se formalizaran entre o 1 de outubro de 2013 e o 30 de setembro de 2014.
A principal novidade que comparten os dous programas é a posibilidade de solicitar a axuda por establecemento como traballador autónomo e a subvención financeira sen necesidade de estar dado de alta no correspondente réxime da Seguridade Social no momento da solicitude.
MENORES DE 30 ANOS
Por unha parte, o Diario Oficial de Galicia publica tres liñas de axudas diferentes dirixidas en exclusivo aos autónomos menores de 30 anos, ás que se destinarán 4,5 millóns para beneficiar a preto de 1.500 mozos. Esta medida forma parte das 19 actuacións do Plan de Emprego Xuvenil da Xunta. A orde prevé contías de entre 1.200 e ata 12.600 euros por desempregado.
Segundo informou este martes o director xeral de Traballo, Odilo Martiñá, nesta liña introdúcese, por primeira vez, unha iniciativa "ambiciosa e novidosa", segundo a cal os menores de 30 anos que decidan constituirse como autónomos, e a actividade dos cales non supoña unha inversión elevada, recibirán 1.200 euros. Esta medida, combinada coa tarifa plana estatal de 50 euros, suporá que a súa cotización á Seguridade Social durante o primeiro ano estará subvencionada ao 100 por cento.
Este programa de axudas recolle tres tipos de subvención, para iniciativas de autoemprego xuvenil, co propósito de facilitar aos mozos os ingresos durante o inicio da actividade; para o establecemento como persoa traballadora autónoma ou por conta propia; e unha axuda financeira para a redución de intereses de empréstitos.
A subvención para iniciativas de autoemprego xuvenil terá como único requisito que o emprendedor estea dado de alta no réxime especial de autónomos ou en calquera outro réxime especial por conta propia da Seguridade Social. A axuda será de 1.200 euros, que se incrementará un 10 por cento se o traballo está situado en Lugo ou Ourense.
O segundo tipo de axudas, dirixidas a facilitar o establecemento como traballador autónomo ou por conta propia, necesitará, ademais de estar dado de alta, unha inversión en inmobilizado material ou intanxible por unha contía non inferior a 3.000 euros.
As contías a financiar oscilarán entre os 5.000 e os 10.000 euros por mozo desempregado, e variarán en función das circunstancias do beneficiario. Estas subvencións incrementaranse entre 1.000 e 2.600 euros se se acredita unha inversión non inferior a 5.000 euros.
A terceira subvención desta convocatoria, dirixida á redución de intereses, de único pagamento, será equivalente á redución de ata catro puntos do tipo de interese fixado pola entidade financeira que conceda o empréstito, calculada sobre os oito primeiros anos de vixencia deste. As axudas oscilan entre os 5.000 e os 10.000 euros.
MAIORES DE 30 ANOS
Por outra banda, o segundo programa destinado a autónomos que este martes publica o DOG está dirixido a maiores de 30 anos e inclúe axudas de entre 5.000 e 10.000 euros tanto para o establecemento como autónomo ou por conta propia como para a redución de intereses do empréstito necesario para o financiamento do inmobilizado.
A consellería dedica a este programa preto de 10,8 millóns de euros, cos que prevé beneficiar a preto de 1.800 autónomos maiores de 30 anos.
