A biblioteca de Verín estrea unha mostra sobre o ilustre psicólogo Eloy Luis André

A biblioteca pública municipal de Verín acolle dende o luns a exposición “Silencio, soidade, carácter”, centrada no psicólogo, filósofo, pedagogo e escritor nado na vila verinesa en 1878.

A exposición, organizada por Autora Prieto, Miguel Losada e Vicente R. Justo, fai un percorrido polos momentos máis intensos da vida de Eloy Luis André e a súa obra.

Esta mostra ubícase no primeiro andar da biblioteca, e pódese visitar libremente de luns a venres de 10,00 a 13,30 e de 16,00 a 20,30 horas, e os sábados de 11,30 a 13,30 horas.

Xornadas sobre a figura do psicólogo e filósofo

Acompañando á exposición, o Consello da Cultura Galega e o Concello de Verín organizan unhas xornadas sobre a figura do intelectural verinés, cunha serie de charlas que terán lugar no salón de actos da vila os xoves 3, 10, 17, 24 e 31 de outubro, ás 19,30 horas.

A primeira delas, a cargo do psicólogo Xosé Ramón García Soto, leva por nome “Psicoloxía: cambio social e perfección persoal”, e afondará no labor de André como iniciador da psicoloxía en España.