Comeza o festival de cine de Verín con 26 curtas a concurso

Verín xa é sinónimo de cine estes días co arranque da sexta edición do seu festival de curtametraxes, o FIC Vía XIV, que, durante os vindeiros días, encherá a vila de actividades temáticas paralelas -serán unha ducia- e proxectará unha selección oficial de 26 pezas audiovisuais procedentes de 12 países diferentes e encadradas nas clásicas categorías do certame: Outra Mirada, Horizontes, A Raia e Nova. Este sábado a última hora celebrouse a gala inaugural na vila do Támega.

Este ano, e tal e como se anunciou recentemente, a principal novidade radica en que, por vez primeira, as curtas oficiais a concurso poderán seguirse online a través de Festhome no enlace https://tv.festhome.com/festivaltv/fic-via-xiv. Neste senso, ademais das curtas oficiais, poderá verse en Verín unha retrospectiva de filmes do Tempo Documentary Festival, festival convidado nesta edición polo FIC Vía XIV.

Xunto a isto, o FIC Vía XIV de Verín acollerá a preestrea en Galicia do documental Tierra de leche y miel, dirixido polo verinés Héctor Domínguez-Viguera xunto a Gonzalo Recio e Carlos Mora. Do mesmo xeito, a presentación da webserie ourensá Os tempos mortos do fuhrer e a estrea do documental Capuchóns, realizado polo verinés Iñigo Rolán Taboada como traballo de fin de grao, tamén se proxectarán dentro do festival verinés.

Por último, a musicalización de cinema mudo en directo, a cargo do Casperverk Trío, e a presentación do libro Son para audiovisuais, de Rafael Godás Ibáñez, protagonizarán tamén cadansúa actividade paralela no marco da vindeira edición do FIC.

Como cada ano, o festival renderá homenaxe a unha figura representativa do audiovisual galego, sendo nesta ocasión o actor e comunicador ourensán Sergio Pazos quen recibirá este recoñecemento.